प्रेमास्तव

तुझी आठवण आली, मन सैरभैर झाले

अन मनाशीच माझ्या; माझे हाडवैर झाले

काही सुचता सुचेना; काही गमता गमेना

मन उधळे चौखूर, कोठे रमता रमेना

एकीकडे ध्यास तुझा; एकीकडे यश किर्ती

मन हिंदोळे हिंदोळे; जशी ओहोटी नि भरती

काय करावे कळेना; उरी प्रेम येई दाटून

घेई मजला कवेत; वा दूर दे लोटून

तूच यक्षप्रश्न माझा; तूच उत्तर तयाचे

तूच भाग्योदय माझा; तूच कारण लयाचे

तुज साठीच मजला; जग जिंकावे वाटते

जग जिंकता जिंकता, तुला विसरावे लागते

बास झाला आता छळ, नाही सोसत ही कळ

प्रेमास्तव जगण्याचे; मिळो मनास या बळ

© Copyrights Reserved Avadhoot Kulkarni

जर ही कविता कुणाला पाठवायची असेल तर कृपया सोबत ह्या ब्लॉगची लिंक 

http://mazikalpana.blogspot.com/ सुद्धा पाठवावी ही विनंती.